AC殘陣擋唔住拿玻里
今晚意甲上演大戰，AC米蘭主場對拿玻里，AC今季以「青春班」殺出一條新血路，一班後生仔表現令人驚喜，可惜其中兩位新星主將文路爾盧卡迪利、阿利斯奧羅馬洛尼今場都要停賽，勢必打亂教練蒙迪拿部署。拿玻里火力全開，梅頓斯入波停不了，可以乘虛而入，射破對手大門，捧拿玻里客勝。（TVB 302周日凌晨3時45分直播）
AC米蘭上仗驚險逼和拖連奴2比2，亦付出沉重代價，中場文路爾盧卡迪利累積黃牌夠數，中堅阿利斯奧羅馬洛尼更加被逐，兩人今仗一齊坐「波監」。加上左閘迪施基利奧受傷缺陣，「紅黑兵團」防線認真危危乎。AC近4次對拿玻里，僅得1和3負，情況非常不妙。
客軍梅頓斯着晒火
拿玻里各項賽事已經保持連續13仗不敗，近8仗更取得7勝，皆因陣中比利時國腳梅頓斯着晒火，近5場聯賽個人轟入9球，勒都勒唔住。事實上，拿玻里以往鬥AC米蘭，一眾進攻球員表現特別醒神，近4次交鋒，拿玻里唔止取得3勝1和，而且共攻入12球，包括上季作客炒AC米蘭4蛋，今季主場又贏4比2，簡直當AC防線冇到，更何況AC今仗中後場人腳不整，拿玻里有力再贏多一鋪。
页:
[1]