北部打吡 孖堡兄弟做細界
今晚德甲上演北部打吡，禾夫斯堡同漢堡上演「孖堡」對決，兩軍歇冬前狀態雖然唔錯，但同樣遇上火力不足問題，加上雙方近年對壘都係悶戰居多，近5次碰頭全開細盤，投X首選1.87倍中位數2.5球嘅入球細。（Now 670周六晚10時30分直播）
禾堡高美斯主場例腳軟
禾夫斯堡歇冬前兩連勝，歇冬期去咗西班牙東南部集訓，佢哋轉會窗動作好大，先以4,000萬歐元將王牌達斯拿賣畀巴黎聖日耳門，跟手用番近3,000萬歐元補充番3名新兵，包括緬恩斯嘅發電機尤路斯馬爾尼、雷恩嘅法國國腳左翼拿塔，同20歲嘅阿積士荷蘭國腳中場巴素亞，前兩者今晚都會擔任正選，不過佢哋初嚟埗到相信要時間適應。禾堡係德甲主場成績最差同入球最少球隊，原因係首席射手馬里奧高美斯不但把握力不足，心理質素亦有問題，球隊今季8場主場聯賽，佢全數擔正，但除咗冇波入外，仲場場都踢得好差，難聽啲講係經常幫助對手解圍，搞到禾堡8場加埋只入得5粒，主場毫無威力可言。
漢堡執掂防線頂得吓
漢堡歇冬前4戰3勝，仲拉咗隊去杜拜集訓，歇冬期亦動作多多，由德乙卡爾斯魯厄挖走體育總監贊斯托特，立即着手重建防線，先賣走唔夠班嘅巴西中堅基巴萊斯，亦同36歲波斯尼亞長者中堅史柏希斯解約，然後一口氣補充番兩名較具分量中堅，包括買入科隆嘅阿爾巴尼亞國腳馬拉積，同向利華古遜借得希臘國腳柏柏杜普路斯，成條防線硬淨好多。即使門將艾達養緊傷，但頂檔嘅副手馬菲尼亞踢得仲掂，6場比賽不但3勝兩和，當中贏達斯泰特同史浩克表現尤其出色。不過漢堡前線缺少咗射手拉蘇加，球隊今季8場作客只入得6球，今晚到訪禾堡都唔預佢哋會主攻，細盤穩陣。
页:
[1]