皇馬遇私房菜拉唔住
西甲榜首皇家馬德里上輪作客魯營驚險保住不敗身，喺聯賽榜保持6分嘅領前優勢，今晚返主場巴拿貝迎戰拉科魯尼亞，係時候嚟番場「大屠殺」。皇馬近4次喺主場對拉科魯尼亞贏晒，其中3次更係大炒收場，以拉科今季疲弱防守，極可能又輸鑊甘，讓球主客和皇馬讓兩球都要讓球主勝。（Now 632周日凌晨3時45分直播）
「銀河艦隊」今季雖然接連有主力受傷，但喺西甲仍然未逢1敗。隨住卡斯米路復出，最近連德國國腳卻奧斯都提前投入操練，皇馬依家直頭有人滿之患，主帥施丹為留力世冠盃，今場決定收起C朗同賓施馬等主力，一眾後備球員為爭正選，落得場當然會盡砌表現自己，適逢今仗對手拉科魯尼亞係皇馬近年「最愛」對手，皇馬近4次主場對拉科魯尼亞，除1次贏2球外，其餘3仗都狂數對手至少4球，「銀河艦隊」心理上都贏晒喇。
拉科後防穿窿等劏格
拉科魯尼亞目前陷降班危機，球隊入球能力唔差，可惜防守就形同虛設，近10仗聯賽都有失波，其中3仗被對手攻入4粒。雖然佢哋上輪5比1大破皇家蘇斯達終止6仗聯賽不勝頹勢，但作客皇馬如果想對攻，無疑以卵擊石，畀皇馬炒多次絕不出奇。
页:
[1]