皇馬讓得辣捧對家
領先丙組仔6粒 留力砌打吡今晚續有多場西盃第４圈賽事，兩大班霸皇馬及巴塞分途出擊對丙組仔，「銀河艦隊」皇馬於次回合主場迎戰利安尼沙，巴塞則喺首回合作客靴高斯，兩軍王牌C朗同美斯都有傷，加上嚟緊周末雙方就會合演國家打吡，今仗隨時勒住，皇馬首回合已遙遙領先6粒，今仗唔使去咁盡，讓球主客和仲要讓3球咁辣，梗係轉捧利安尼沙2.1倍「讓球客勝」。
（周四凌晨2時開賽）
皇馬日前聯賽小勝希杭2比1，梅開二度嘅C朗完場嗰陣拐下拐下離場，儘管尋日有份參加訓練，但主帥施丹為免國家打吡前有乜閃失，今仗西盃再鬥丙組仔利安尼沙，收起呢位王牌唔奇。
由於皇馬下月要出戰世冠盃，因此西盃第４圈首回合提早喺10月尾踢咗，睇番佢哋首回合個陣容，施丹都係派盧卡斯華斯基斯、拿祖費南迪斯及已淪為後備嘅占士洛迪古斯落場，都照炒7比1晉級在望，今仗隨時有保留，斯維認為「銀河艦隊」頂盡贏1至2粒等收工，一於撐利安尼沙「讓球客勝」。
美斯受傷巴塞獻「細」
至於巴塞則喺首回合造訪丙組仔靴高斯，始終國家打吡大過天，西班牙傳媒預料主帥安歷基今仗會派出全副選上陣，例如新加盟後一直忘帶射門鞋嘅柏高艾卡沙，呢位前華倫西亞射手同巴塞好似八字唔夾咁，搵佢擔大旗唔多老利。巴塞日前喺聯賽逼和皇家蘇斯達1比1，完場前王牌美斯被對手掃跌導致有輕傷，尋日都冇跟球隊操練，只係獨自喺健身室訓練，安歷基為安全起見，今仗唔用美斯亦無可厚非，加上巴塞近4次對靴高斯，每仗總入球最多3球，今場入球大細中位數3.5球，玩1.92倍細盤好過。
（周四清晨5時開賽）
页:
[1]