皇馬-3炸爆希杭
西甲近期最勁爆球隊，非皇家馬德里莫屬！由施丹帶領嘅「銀河艦隊」近期場場大炒對手，喺西甲已經帶開次席嘅巴塞隆拿4分穩佔榜首，球隊上下士氣如虹，今晚主場迎戰弱旅希杭，大屠殺味道非常濃郁，C朗拿度同一眾攻擊手輪流發威，讓球主勝[-3]冇甩拖！（Now 632周六晚11時15分直播）
得分點多 巴利長抖未驚過
皇家馬德里近期狀態大勇，近5場聯賽全勝之餘，其中4次仲要好唔客氣咁數對手3球或以上，C朗固然當弗，但皇馬依家最強地方，就係佢哋已經唔再係C朗一人球隊，當呢張「王牌」受到凍結，皇馬仲有好多得分點，好似賓施馬、艾斯高同占士洛迪古斯落親場都有貨交，即使C朗冇波入嘅賽事，皇馬照樣可以夠輕鬆擊敗對手，今場加里夫巴利受傷等緊開刀，據報要抖成4個月，好在沙治奧拉莫斯已復操，以皇馬目前嘅氣勢，絕對係遇神殺神！
作客嘅希杭被視為降班熱門，開季頭3仗狂搶7分之後，立即打回原形做番「魚腩」，近9場聯賽2和7負未贏過波，而且佢哋今季遇上巴塞隆拿同馬德里體育會兩大班霸嗰陣，不約而同以吞5蛋嘅羞家成績收場，今仗面對火力更強嘅皇家馬德里，大敗似乎係必然嘅結局。
页:
[1]