高手過招往績5連細 馬德里雙雄但求唔輸
今晚Super Saturday壓軸尾場，爆發西班牙首都打吡，由「床單兵團」馬德里體育會主場火併「銀河艦隊」皇家馬德里。仇人見面分外眼紅，呢對同市宿敵為面子為攞彩，勢必踢到飛沙劈石，絕對唔想於打吡戰輸波失威，「床單兵團」今季防線固若金湯，皇馬就算強攻，要破其銅牆鐵壁亦非易事，況且近5次交鋒，每仗總入球皆少過3粒，今仗高手過招未必多波入，轉捧細盤（2.5球）好過。（Now 632周六深夜3時45分直播）「銀河艦隊」近期頭頭碰着黑，先有中場「魔笛」莫迪歷及卡斯米路受傷，到「魔笛」接近康復，輪到另一中場大師卻奧斯重創，提早告別2016年。雖然「銀河艦隊」一向靠前線「BBC」賓施馬、加里夫巴利、C朗數胡，但若然冇卻奧斯等支援及控制比賽節奏，「BBC」亦難無顧之憂爭取士哥，主帥施丹於國際賽前試用高華錫、艾斯高等中場，不過效果一般，尤其係缺少硬淨防中卡斯米路做掃蕩，隊長沙治奧拉莫斯剛傷愈未弗及中堅比比仍養傷之下，令施丹不得不考慮加強防守。
馬體會全民皆「守」
「床單兵團」在主帥施蒙尼帶領下，以瘋狂逼搶見稱，隊長基比、佐治高基等皆屬擅搶悍將，連箭頭基沙文都經常回防助守，可謂全民皆「守」，而且由桑法蘭托里斯、高甸、菲臘路爾斯等組成嘅防線默契十足，連同屢有神救的門將奧比歷，單計今季聯賽只失8球，僅次於維拉利爾為失波第二少嘅球隊，「床單兵團」後防可謂密不透風。
何況今仗迎戰死對頭皇馬，馬體會必定加多兩錢肉緊，每每攔波都勢兇夾狼，務求將戰火遠離自己禁區。事實上，呢對馬德里同市宿敵，近5次正面交鋒，每仗總入球皆為1球起、2球止，戰情極為緊湊，「銀河艦隊」箭頭賓施馬亦因傷上陣成疑，大家都唔想輸波失威之下，相信今仗都係咁樣格局，入波唔慌多，一於捧細盤（2.5球）。
页:
[1]