國足誓爆卡塔爾
納比接手不可能任務今晚其中一場焦點必屬世盃外圍賽亞洲區第3圈A組賽事，中國主場對卡塔爾！今仗係納比執掌國足帥印後，首次領軍踢正式賽事，中國足協希望以呢位金牌教頭嘅功力帶領國足絕地反擊，完成「不可能的任務」，殺入2018年決賽周。全國亦為今仗作出配合，包括安排喺高原地區昆明比賽。天時地利人和幫晒手，梗係捧1.88倍嘅主勝。
（周二晚7時35分開賽，馬會網上文字直播）
熟晒環境擅打逆境戰
國足依家喺A組4戰得1分排小組包尾，出線形勢極為惡劣，但納比曾於2006年帶領意大利克服意甲「電話門」假波醜聞，捧走當屆世盃冠軍，證明極擅長打逆境戰。加上佢執教廣州恒大淘寶（FC廣州）兩年，捧過中超及亞冠盃，熟悉亞洲足球情況，無疑係拯救國足嘅最佳人選。內地今次亦團結一致支持納比領軍，原本廣州恒大淘寶已經同佢簽約，最後都放人畀國足，更有傳納比接手國足嘅2,000萬歐元（約1.7億港元）年薪係由恒大支付。事實上國足以恒大球員為骨幹，納比可謂熟晒地頭，佢透露會使出「秘訣」幫國足翻生，令人期待。
昆明高原作賽恰對手
今仗作為納比第一擊，內地各方面都做好準備同針對性部署，包括安排喺高原地區昆明集訓同比賽，令卡塔爾球員難以適應當地氣候，演出絕對會受影響。卡塔爾現時只比國足多2分排尾二，證明水準一般。值得留意係上一圈外圍賽，中國同卡塔爾都係同組，中國主場一役以2比0擊敗對手，成為進身第3圈最關鍵1戰。中國再遇呢支「福星」，贏波信心都大啲，加上「新帥效應」支持，相信國足可以威番次。
页:
[1]