佩斯卡拉上盤益里
莊家企硬畀晒貼士人有三衰六旺，唔會有人成世都咁黑仔，好似黑咗一排嘅大戶，近日頻有斬獲，幾鋪就返晒嚟，今晚重心推介場次，係意甲頭場佩斯卡拉主場對安玻里，兩隊衰鬥衰真係幾難揀，但見大戶入定佩斯卡拉上盤，似乎有啲嘢喎，一於照撐佩斯卡拉上盤。
（TVB 302周日晚7時30分直播）
之前講過大戶自開季後手風堅唔順，無論賽前入貨、走地追大細盤等，真係掂邊瓣衰邊瓣。不過山窮水盡疑無路，柳暗花明又一村，何況大戶手握嘅龐大資訊及數據，只要擺明心態，冇因頻頻失利而影響判斷，佢哋要翻身，其實唔難。
大戶頻得手唔怕跟
好似上周中歐聯曼城對巴塞，大戶先喺賽前重錘曼城下盤，當「藍月亮」輸緊1粒嗰陣，佢哋繼續追呢支英超勁旅及大盤，最終曼城反勝3比1，甚至收復之前幾周嘅失地兼有賺，睇嚟佢哋已經返晒嚟喇。
講番今晚重心場次，意甲頭場佩斯卡拉主場對安玻里，佩斯卡拉連續9仗未贏過，近3仗全敗，安玻里亦唔好得幾多，近8仗未嘗勝果，絕對係海軍鬥水兵格局。奇就奇在，初盤佩斯卡拉仲要讓平半，照道理今仗開平手盤比較正路，但操盤手堅持佩軍要讓波，應該係有啲計，而且肥叔見到大戶靜靜雞入定上盤，似乎係收到風先咁買，肥叔決定信佢哋，呢個上盤應趁早買定。
页:
[1]