利洛組合愈踢愈神 不敗大戰拜仁搶芬
今輪德甲焦點當然係「不敗大戰」，榜首拜仁主場迎戰3哥賀芬咸，兩軍經過9輪聯賽都未輸過。客軍喺少帥拿高斯文帶領下最近喺德甲5連勝，今晚以「從未有過嘅自信」作客安聯球場，聲言會繼續搶攻，遇上拜仁前線最火熱配搭嘅「利洛組合」，肯定會係一場對攻好戲，黑柴推介中位數3.5球嘅大盤。（Now 672、有線61及201台周六晚10時30分直播）
相信大家都記得，拜仁昔日喺軒歷基斯帶領嘅五冠王強勢年代，前線洛賓同列貝利一雙魔翼縱橫天下，將敵衞玩弄於股掌之中，德國傳媒為之驚嘆，將佢哋名字加埋拼成Robbery稱號，近期洛賓喺教練安察洛堤畀番佢更多自由下重生，配合勇達巔峰嘅射手羅拔利雲度夫斯基，喺上輪作客奧格斯堡嘅聯賽，兩人包辦晒3個入球同3個助攻，德媒再之畀佢哋一個新合併稱號：Robbandowski！黑柴簡單叫佢哋做「利洛組合」，因為佢哋每次組織都清脆利落，輕易撕破對方防線，洛賓話佢同利雲本身踢法各有優劣，但經過夾慣夾熟後，依家互補不足，發揮出嚟嘅威力已經唔係1+1=2咁簡單。
事實上，羅拔利雲度夫斯基今季持續勇態有餘，喺3線作戰14場賽事交出14個入球同4次助攻，極為恐怖，而佢喺周中歐聯作客燕豪芬之役，全場個人共取得8次射門，當中兩個入球之餘仲有3次中柱，實在火熱得交關，而計到呢一刻，佢喺歐聯為拜仁上陣56場入咗36球，亦追平咗巴塞球王美斯當年同期成績添！今晚主場遇上今季神奇球隊賀芬咸，拜仁當然唔會輕敵，預期呢對「利洛組合」會繼續強勢交功課。
賀芬咸「從未有過嘅自信」
不過，賀芬咸喺29歲少帥拿高斯文帶領下亦來勢洶洶，聯賽9戰不敗兼近5仗全勝，排第3位只落後拜仁4分，隊長施巴斯坦魯迪話，少帥嘅新「352」陣式非常奏效，現時每個球員都比上季強，而且自信未到止境，仲可以有更大進步，今晚會以「從未有過嘅自信」挑戰班霸，而且佢哋唔會放過任何進攻機會，要帶畀球迷一場難忘比賽，你話今仗入波又點會少呢？
页:
[1]