近9次交手未輸過 墨爾本勝利財悉兼收
周六澳職重頭戲，FC悉尼主場對墨爾本勝利；榜首FC悉尼今季聯賽4戰全勝，理論上較值得睇好，不過墨爾本勝利上仗大炒威靈頓鳳凰6比1，表現令人刮目相看，而且墨爾本勝利一向係FC悉尼嘅剋星，兩隊近9次交鋒，墨爾本勝利獲得4勝5和不敗佳績。墨爾本勝利今仗有得受讓，有權財「悉」兼收，1.85倍讓球客勝當然咪錯過啦！（有線64及203台周六下午4時50分直播）
FC悉尼攻力跌Watt
FC悉尼近況甚弗，聯賽開季至今4戰4勝，攻入11球之餘，而且1球波都冇失過，不過要留意當中有8個入球係首兩仗攻入，對手只係兩支弱隊西悉尼流浪者同中岸水手。近2仗FC悉尼只係小勝威靈頓鳳凰1比0，以及贏紐卡素噴射機2比0，鋒力有明顯下滑迹象。事實上，一支球隊難以長期保持最佳狀態，今仗隨時會獲利回吐，不宜繼續追捧。
墨爾本勝利今季聯賽只曾不敵同市對手墨爾本城，近2仗聯賽分別贏阿德萊德聯2比1，以及上仗大勝威靈頓鳳凰6比1；前鋒貝利沙上仗更大演帽子戲法，中場馬高洛查士亦梅開二度，兩位進攻猛將狀態確係非常好，今場隨時再有士哥。數據上墨爾本勝利亦佔盡優勢，近9次對FC悉尼，取得4勝5和不敗佳績，其中近4次交手墨爾本勝利更贏3次，今場呢支墨爾本球隊受讓，讓球客勝值得捧場。
页:
[1]