米堡守細波 抗曼城
今晚英超「1哥」曼城主場出戰下游分子米杜士堡；「藍月亮」雖然啱啱歐聯擊敗巴塞，但球員搏到好盡，未必咁快回到氣。米堡有「寸王徒弟」卡蘭卡掌舵，客場一向擅玩龜縮，連火力全開嘅阿仙奴都攻唔入佢哋，預計曼城今仗要入波唔係話咁易，捧中位數2.5球嘅入球細。（Now 621周六晚11時直播）
藍月亮兵疲惡唔出樣
曼城成功擺脫早前6場不勝困局，先喺上仗聯賽向西布朗狂派4蛋，去到周中歐聯喺落後1粒嘅劣勢下，憑住堅爆意志最終反勝巴塞3比1，非常犀利。不過一班曼城球員都搏到好盡，特別係王牌射手阿古路雖冇波入，但佢整場比賽瞻前顧後四圍走，臨尾仲助攻畀根度簡埋齋，你話唔攰就假喇！
事隔8個球季，米堡今季終於重返英超，現階段當然以護級為首要目標，希望搶得1分得1分；主帥卡蘭卡係皇馬舊將，前幾年曾喺「銀河艦隊」擔任領隊莫連奴嘅助手，喺「寸王」身上偷師唔少，尤其係防守方面，因此今季米堡客場出擊最鍾意玩龜縮，佢哋連盃賽在內，單計近5仗作客比賽，有4仗總入球係少過3粒，代表作係造訪酋長球場，以0比0悶和火力強橫嘅「2哥」阿仙奴，而且有幾次突擊更幾乎收死兵工廠。今場面對兵疲嘅曼城，卡蘭卡隨時又玩死守呢招，預料唔慌多波入，細盤乃不二之選。
页:
[1]