帶嘩鬼倒戈失意地 寸王鍊車去到盡！！
嚟緊就到萬聖節，今晚英超大戰莫連奴就帶曼聯班「嘩鬼」踩入車路士主場！今仗係「寸王」畀舊東家車仔炒魷後，首次重返史丹福橋球場，雖然曼聯開季至今未算突出，但相信「面子大過天」嘅莫連奴會再施「泊大巴」死守戰術，點都唔想係呢塊失意地失威，1.66倍嘅讓球客勝固然隱陣，3.15倍嘅和更值博！（Now 621及Le SportsHK應用程式周日晚11時直播）
曼聯今季由莫連奴領軍，又有標王保羅普巴同「呂布」伊巴謙莫域加盟，季初真係令人無限憧憬！但至今8戰只拎到14分，呢個分數係「寸王」近年開局頭8場最低分數，睇番上季「方丈」尹戈爾同輪數都拎到16分，寸王真係失晒威囉。曼聯上輪聯賽同利物浦合演嘅雙紅會中，控球指數得35%，亦係自2003/04年有紀錄以嚟喺英超嘅最低百分比，無論成績同表現都令粉絲失望。
曼聯神鋒伊巴謙死火
曼聯個別球員亦畀人喪插，隊長朗尼就畀人笑佢「月巴」，肥夾論盡冇腳好波，而伊巴謙季初威過一輪後，近4場聯賽冇斬獲，好在佢哋仲有迪基亞，呢位「鋼龍」喺雙紅會中上晒身，作出2次神救，其中一次就係菲臘比古天奴出絕招喺左路扣入中路勁射，但都畀迪基亞飛身單手救出，相信莫連奴今仗又會出番拿手招數，喺史丹福橋「泊大巴」死守，最低限度拎1分先！
車仔隊長泰利復出
車路士上個月接連輸畀利物浦同阿仙奴後，最近2場聯賽都變陣以3-4-3出擊，果然有反彈表現，作客先以2比0贏侯城，到上輪主場就以3比0大炒衞冕嘅李斯特城。今仗賽前領隊干地亦帶來喜訊，傷咗一排嘅隊長泰利已經復操，佢同早前喪母嘅中場韋利安肯定可於今仗復出，有番泰利呢位「定海神針」，相信車仔後防會定番好多。既然大家都唔想輸，今場和局絕對係信心之選！
页:
[1]