巴塞十月圍城
哥帥倒戈祖家輸晒今晚歐聯上演C組重頭戲，巴塞隆拿主場對曼城。曼城領隊哥迪奧拿連續4屆歐聯領軍鬥西甲兵團，但佢身為西班牙名宿偏偏患上「恐西症」，前3屆執教拜仁慕尼黑3次返祖國比賽，全敗兼捧蛋，包括舊年5月倒戈魯營大敗0比3，呢種宿命唔到你唔信，讓球盤巴塞讓一球有1.7倍，要上盤。
（有線61及201台周四凌晨2時45分直播）
哥帥死板易被睇穿
哥迪奧拿曾於西甲呼風喚雨，球員時代協助巴塞6奪西甲冠軍及1次歐聯，再以教練身份為「地上最強」3奪西甲及兩度成為歐洲王者。不過佢離開西甲執教拜仁，竟然對祖國球隊束手無策，過去3屆歐聯4強分別畀西甲三雄皇馬、巴塞同馬體會淘汰，當中3場作客都敗陣兼冇波入，輸得最慘正係0比3不敵母會巴塞。
哥迪奧拿今季接手曼城，睇怕亦難破呢個「宿命」，皆因佢多年嚟戰術死板，強調控球在腳，早已畀西甲老對手們洞悉。再講任何球隊同巴塞鬥控球，只會獻醜，亦係拜仁上年作客魯營大敗嘅主因，曼城現時人腳點睇都勁唔過上年嘅拜仁，更難突圍。
MSN齊腳嗒「私房菜」
翻查往績曼城一直畀巴塞剋死，雙方曾於2013/14及14/15球季歐聯4次交鋒，曼城全部輸晒，淪為巴塞「私房菜」，加上曼城狀態亦比季初下滑，上輪歐聯打和些路迪3比3後，近兩場英超都失分，今場受讓一球都制唔過。反觀巴塞上仗西甲大炒拉科魯尼亞4蛋，美斯傷愈復出，後備上陣3分鐘即入波，「MSN」齊腳下要撕開曼城條防線，並唔困難，勢必射爆前隊友哥迪奧巴禾把守嘅大門。
页:
[1]