曼市打吡和味濃
9億人關注70億大戰英超爆「70億」曼市打吡！曼聯同曼城兩支身價達70億球隊今晚對撼，兩軍教頭莫連奴同哥迪奧拿以往喺西甲鬥餐飽，今次首次喺英超碰頭，全球將有190個國家及地區直播，總共9億人睇波，大家點都唔想失威，睇怕今場都幾難分到勝負，3.15倍和波絕對係心水之選。
（Now 621及樂視周六晚7時30分直播）
勁過皇巴大戰 刷新英超紀錄
英國《電訊報》報道，話全球近190個國家及地區直播今場曼聯主場對曼城嘅打吡，有成9億人睇波，比起上年11月西班牙國家打吡皇馬鬥巴塞多3億人，仲刷新埋英超紀錄。
上季聯賽只得第5、失去歐聯資格嘅曼聯今季搵嚟「寸王」莫連奴領軍，表現果然脫胎換骨，開季至今3場聯賽全勝。一眾新兵更大踢身價波，尤其伊巴謙莫域演出對辦，3場聯賽轟入3球，呢位34歲神鋒賽前仲送咗件自家品牌嘅訓練波衫，畀剛投曼城嘅門將哥迪奧巴禾，表面係歡迎對方嚟到曼市，但暗地裏好似串緊巴禾要多啲練波喎！
不過最令人驚喜要數艾歷拜利，呢位以3,000萬鎊由維拉利爾轉投嘅中堅火速適應英超節奏，多次為紅魔化險為夷，令曼聯頭3場聯賽只失1球，獲球迷選為8月份最佳球員，有佢同「神龍」迪基亞鎮守後防，曼聯防線可以用「滴水不漏」嚟形容。
阿古路停賽曼城削攻力
曼城攻力有幾勁唔使多講，但弗到漏嘅射手阿古路上輪對韋斯咸因造出粗野動作，畀英足總判罰停賽3場缺陣今場打吡，令曼城鋒力打折扣，不過中場大衞施華就話唔會因為咁而死守，講明一定要搶贏中場。曼城喺國際賽期時只有8位球員需要踢「太公波」，比曼聯少5位，球員累積飛行里數亦比紅魔兵少2萬里，體力絕對有優勢。雙方近況同實力接近，相信今晚會鬥得難分難解，3.15倍和波絕對值得支持！
页:
[1]