紅軍搵AC出氣
國冠盃歐美站賽事，英超傳統勁旅利物浦，將喺美國加州硬撼意甲老牌球隊AC米蘭。利物浦今夏大事擴軍，主帥高普希望試出最佳陣容，相信荷蘭中場韋拿杜姆有望首度披甲，紅軍上仗雖然輸畀車仔，但要贏沒落豪門AC米蘭唔難，主勝好路。（有線61及201台周日早上10時直播）
為帶領利物浦重振雄風，高普今個暑假一口氣簽入卡利奧斯、卡拉雲、沙迪奧文尼、韋拿杜姆等實力派球員，又收回借將拿沙馬高域同馬高古積，連同菲臘比古天奴、羅拔圖法明奴、史杜列治等主力齊齊赴美征戰國冠盃，陣容強勁，就算連場大戰，亦有足夠球員畀高普調動，體能唔需要懷疑。
AC米蘭人腳唔齊
事實上利物浦依家人手太多，一眾球員為保飯碗同爭奪正選位置，有機會落場定必全力以赴。況且，對家AC米蘭實力已今非昔比，射手卡路士巴卡因提出轉會要求，未有隨軍赴美，令AC米蘭本身已不強勁的實力再進一步削弱，加上2年前國冠盃交手，AC曾以0:2落敗，對住已經踢過5場熱身賽、上晒力嘅紅軍，難以全身而退。
页:
[1]