伊巴掃雷報寸王大恩
成魔第一擊氹鄉親
今晚熱身賽好戲連場，英超4雄齊出擊！當中最矚目之戰必定係曼聯喺中立場瑞典哥德堡，出戰加拉塔沙雷，事關伊巴謙莫域已經歸隊，可望首次為紅魔鬼披甲，而且仲喺祖家登場，夠晒派頭。呢位神鋒獲額外假期叉足電，成「魔」處子戰，梗係要做齣好戲，報答「寸王」莫連奴知遇之恩， 射爆加拉塔沙雷。加軍中場前人腳亦不俗，有力入波，最好捧大。
（now 640周日凌晨1時30分直播）
曼聯早前國冠盃「中國站」非常濕滯，1比4大敗畀多蒙特，對曼城一役又因球場草地問題取消，難免影響領隊莫連奴備戰計劃。促使「寸王」更加重視餘下熱身賽，球隊日前飛抵英國，已即時操練，今次瑞典之行，勢必嚴陣以待，相信會排出最強陣容出擊，冇份對多蒙特上陣嘅朗尼、迪基亞，今仗應會擔正。
最重要係新兵伊巴謙莫域已於周四歸隊操練，呢位瑞典巨星獲莫帥「優待」豁免中國之行，依家曼聯好需要1場勝仗重振雄風，伊巴謙莫域肯定識做，搏老命回報「寸王」，更何況佢成「魔」首仗喺祖家瑞典踢，更加冇理由令鄉親失望。
寸王清洗9將 小豬退出德國隊
此外，「寸王」計劃實行精英制，將一隊球員縮減到24人，據悉舒韋恩史迪加、贊奴沙、麥尼亞、泰萊布力基等9人冇得留低，舒韋恩史迪加昨日更宣布，退出德國國家隊，希望專心球會賽事，以延長球員生涯。喺「寸王」鐵腕管治下，曼聯球員肯定唔敢偷懶，相信熱身賽都會全力以赴。
加拉塔沙雷前線入到波
至於土耳其球隊加拉塔沙雷有葡萄牙前鋒阿文度布馬回巢，呢位21歲新星上季被外借去皇家蘇斯達，表現麻麻只入兩球。不過阿文度布馬知恥近乎勇，近3場熱身賽為加拉塔沙雷射入4球，配合荷蘭中場史奈達、土耳其名咸美艾天托普，有一定威脅力，相信唔會捧蛋。
页:
[1]