曼聯多蒙特大鬧上海灘
米希達利恩香川倒戈對撼國際冠軍球會盃今晚爆發！近年愈搞愈大嘅國冠盃，已經成為每年季前嘅重頭賽事，今屆中國站頭炮更搵嚟擂台躉曼聯，同德甲勁旅多蒙特「決戰上海灘」，戲碼強勁！由於兩隊都有唔少主力缺陣，練兵至上之下勝負難料，不過呢場吸金表演賽同時肩負娛樂球迷重任，相信兩隊都會踢得較開放，玩入球大有着數。
（有線61及64台周五晚8時直播）
寸王領紅魔娛樂球迷
曼聯係國冠盃常客，對上2屆都有參賽，2014年仲勇奪冠軍，今季由莫連奴執教更有睇頭，不過「紅魔鬼」目前陣容不整，安東尼馬迪爾、費蘭尼同新兵伊巴謙莫域未有隨隊訪華，有踢歐國盃嘅朗尼、拉舒福特、迪基亞等亦未必披甲，今仗志在提升球員狀態同熟習新戰術，更加重要嘅係踢好波向一班華人粉絲交代。
事實上，曼聯陣中擁有強大火力，今夏由多蒙特加盟嘅米希達利恩，上仗熱身賽贏韋根2比0一仗交出助攻，表現大獲好評，今場倒戈梗係會加多兩錢肉緊，而且桑馬達、迪比都係侵略性十足，加上小將前鋒韋爾堅尼同占士威爾遜都要搏命爭取入波氹「寸王」，絕對有機會繼續數胡。
蜜蜂兵團防線有排執
「蜜蜂兵團」多蒙特今仗同樣唔係夫添，拉菲爾古里路、比薛斯基同祖利安韋高等防守球員踢完歐國盃未歸隊，中堅曉姆斯同防中根度簡離隊，另一中堅蘇保迪因傷未有隨行，成條防線大執位默契唔慌好。不過前鋒奧巴美揚可以披甲，而且同樣係倒戈嘅香川真司都要向曼聯還以顏色，預計兩隊都會以攻為守，做「大」騷娛賓。
页:
[1]