飛起煙剷前鋒 羅馬尼亞獻細
歐國盃A組次輪羅馬尼亞鬥瑞士，兩隊首仗雖然一輸一贏，不過整體表現其實半斤八両。瑞士上仗大部分時間打多個下，只能1球小勝阿爾巴尼亞，前鋒入球能力備受質疑，羅馬尼亞賽前又爆出前鋒艾里碧「煲煙醜聞」，今仗有冇得落場都係未知數，兩隊入球能力都唔強，中位數2.5球嘅入球細值得支持。（樂視體育台周四凌晨零時直播）
羅馬尼亞揭幕戰對法國力戰下僅敗，不過今屆歐國盃出線條件寬鬆，就算排小組第3位都有機會出線，因此今仗冇必要急於搶攻，而且羅馬尼亞大軍賽前爆出醜聞，前鋒艾里碧被指喺揭幕戰對法國一役，半場休息期間匿埋煲煙！呢位射手向來係煙剷，之前入訓練營抑或踢熱身賽都有煲煙紀錄，但依家受到傳媒炮轟，領隊伊奧丹尼斯古睇怕唔敢再用佢！好彩羅馬尼亞喺外圍賽10仗只失2球，防守力有晒保證，唔怕瑞士來犯。
瑞士低效能唔同你急
瑞士依家最大賣點係以格列沙加為首嘅高效率中場線，可惜前鋒施費洛域質素唔算特別高，況且瑞士上仗表現出嘅進攻能力亦好一般，想入多幾粒都唔容易。瑞士依家有3分在手肯定唔會同你急，今仗睇定嚟食隨時大玩控球戰術，工廠仔預計入球數字會偏低，吼入球細穩陣。
页:
[1]