德軍重裝戰車吐烏氣
沉睡兩年靠無間道點醒？C組爭霸熱門德國今晚喺里爾登場，接受烏克蘭挑戰！德國於2014世界盃封王後沉睡足兩年，表現令人失望，但陣中主力得到烏克蘭名將泰摩斯卓克點醒，今晚面對呢支實力次一皮對手都唔會鬆懈，領隊勒夫亦的起心肝重裝完整戰車出擊，絕對夠料打響頭炮，德國讓一球，黑柴撐上盤。
（now 651及樂視體育周一凌晨3時直播）
德軍喺世盃決賽贏阿根廷後，兩年來踢咗19場國際賽，竟然輸咗7場，不敵阿根廷、法國同英格蘭都話情有可原，歐國外輸畀波蘭同愛爾蘭就有啲講唔過去，熱身賽輸埋畀美國同斯洛伐克直情係失禮世界冠軍之名添！領隊勒夫用人唯親，漠視喺德甲上位嘅新星，死攬普多斯基、馬里奧高美斯呢啲過氣契仔唔放，呢個情況兩年前世界盃都出現過，球隊16強排怪陣就幾乎衰喺阿爾及利亞之手，好在到咗重要關頭用番啱陣容，之後連過法國、巴西同阿根廷3大難關奪標。今次情況差唔多，佢哋對斯洛伐克又係亂用人，直至最後檢閱鬥匈牙利終於用番理想陣容輕鬆取勝。
泰摩斯卓克電話報軍情
烏克蘭陣中嘅37歲名將泰摩斯卓克雖已退居後備，但佢成為咗德軍安插喺烏克蘭嘅無間道，皆因佢效力拜仁期間同隊友感情極好，今次賽前仲經常同德軍主力紐亞、湯馬士梅拿通電話，猛讚烏克蘭中前場點樣有料到，今次有信心出線云云。佢仲話德國目前只係尋找最佳狀態階段，今仗對烏克蘭肯定難踢，呢番說話自然令德國隊上下警惕，今仗絕對唔會輕敵。
烏克蘭68歲雙閘任你過
烏克蘭中場係有亮點，耶莫蘭高、高路比恩卡同史堤巴蘭高都得到前輩舒夫真高同泰摩斯卓克好評，但呢班波戰績其實甚曳，外圍賽小組要屈居斯洛伐克之後排第3，最後靠附加賽險勝斯洛文尼亞出線，水準連歐洲二流都好忟。更何況佢哋防線人才凋零，喺過去一年11場波，37歲老將舒夫卓克不但要場場正選，仲要分別頂左閘、中堅同防中不同位置，皆因根本冇人用，今晚佢踢左閘，同右閘費達斯基加埋已經68歲，對住擅打閃電戰嘅德國湯馬士梅拿、達斯拿呢對世界級戰車，等同任爆任劏，隨時連尾燈都望唔到，追都冇得追。
页:
[1]