馬體會矢志推翻皇朝
聖西路爭霸 鐵男施蒙尼報仇歐聯決賽今晚開波啦，皇家馬德里同馬德里體育會喺米蘭聖西路球場上演終極一戰！兩年前馬體會喺決賽大部分時間領先下，補時遭皇馬逼和，繼而加時大敗收場，一場血的教訓仍然歷歷在目，正所謂邊度跌低，就邊度起身，「鐵男」施蒙尼率領馬體會大報復，誓一舉推翻「皇」朝。以呢位阿根廷名宿每季一冠天命，今季係時候輪到歐聯登基，實現大滿貫偉業，博2.05倍馬德里體育會「冠軍」！
（有線61、64、201、203台周日凌晨2時45分直播）
執教馬體會季季奪冠
98年世界盃，施蒙尼「戲走」碧咸，自己亦變成球壇奸角，但如果奸詐可以換取冠軍，相信佢絕對唔介意。事實上，施蒙尼並非奸人，而係足智多謀，成為教練後更將天賦盡展無遺，自2011年12月臨危受命執教馬體會開始，每季都有冠軍落袋，由2012年歐霸、2013年西班牙盃、前季西甲，上季衰衰地都力挫皇馬，捧走西超盃，一步一步帶領馬體會登上巔峰，顯示佢深厚領軍功力，並非單靠奸招。
馬體會今屆歐聯踢得走巴塞隆拿、拜仁慕尼黑，更加唔怕皇馬，因為馬體會由施蒙尼執教下，已打破傳統上被「銀河艦隊」恰死嘅宿命，近10次對賽，馬體會就取得5勝4和1負。值得一提，歐聯史上僅兩位非歐洲教練捧歐聯冠軍，而且都係阿根廷人，以施蒙尼嘅級數，足以繼承前輩衣缽。
除咗施蒙尼每季一冠靚績支持外，馬體會今屆歐聯仲多咗1位福星──費蘭度托利斯。呢位射手職業生涯9次出席決賽8次捧盃，最經典肯定係2012年幫車路士首奪歐聯。費托季尾大翻身，今次大有可能助馬體會首嘗歐聯冠軍滋味。
皇馬C朗帶傷有陰影
至於皇馬1月由施丹接手執教後，表現備受讚賞，但其實只係上手賓尼迪斯教得太差。值得留意「銀河艦隊」喺施丹領軍下，踢咗26場比賽只輸兩場，其中1場正係西甲主場不敵馬體會，可見即使施丹再犀利，遇到施蒙尼，一樣俯首稱臣。
皇馬另一個不利因素係射手C朗季尾受傷後，傷勢一直撲朔迷離，日前又喺操練時疑似撞傷。雖然佢堅稱冇問題，但面對決賽激烈對抗戰，小心又出事。同埋皇馬兩年前捧盃，實在有運，但運氣往往可一不可再，今場隨時要還。
页:
[1]