巴塞西盃搶韁突維
西班牙盃決賽喺馬德里上演「王者之戰」，西甲盟主巴塞隆拿鬥歐霸冠軍西維爾，爭做「雙冠王」！巴塞上月失落歐聯寶座後，化悲憤為力量，季尾5戰全勝，轟入24球兼冇失波，豪奪西甲冠軍，表現無懈可擊，衞冕西盃亦志在必得，難怪主W熱爆至1.16倍。西維爾剛喺上周中贏得歐霸盃，球員或仍沉醉喺慶功之中，加上防守弱，恐怕半場都招架唔住「地上最強」，捧巴塞隆拿1.55倍半場主勝。（now 632周一凌晨3時30分直播）
哨牙蘇近5戰狂轟14球
上季「三冠王」巴塞今季歐聯8強止步，西甲亦贏得驚險，整體成績退步咗，難免令擁躉失望。對於呢支超級勁旅嚟講，自然會覺得慚愧，更加要捧西盃向球迷交代，今場勢必盡數對手，省靚金漆招牌。事實上，巴塞知恥近乎勇，近期踢出5連勝強勢，前鋒蘇亞雷斯更喺呢5場獨取14球，以40球成為本季西甲神射手，絕對係入球保證。加上仲有美斯同尼馬幫手，巴塞要喺上半場攻破西維爾大門，取得領先優勢，其實唔難。
西維爾防線曳爆難靠
至於西維爾上周中反勝利物浦，完成歐霸盃3連冠偉業，但過程並唔輕鬆，上半場更處於落後劣勢。西維爾最大問題係防守差，近14場比賽只有1場可以保持清白之身，當中近3戰上半場都係落後，面對攻力強橫嘅巴塞，防線更加危危乎。
另一關鍵係心態上，西維爾衞冕歐霸盃成功，已經完成任務，可以收工，唔似巴塞下下都話要贏晒所有錦標，西維爾爭勝決心唔及對手。難怪堂堂一場決賽，巴塞贏波居然熱至1.16倍，要讓球半/兩球，西維爾贏波冷到10倍，從今場賠率已充分反映雙方戰意，睇嚟西維爾完全冇得打。
页:
[1]