多蒙特爭盃不甘後仁
德國盃上演夢幻決賽，聯賽盟主拜仁慕尼黑同二哥多蒙特喺中立場柏林奧運球場，爭奪冠軍寶座。今仗係拜仁主帥哥迪奧拿「告別戰」，自然想好頭好尾，捧盃畫上完美句號，但呢支德甲班霸喺盃賽遇上「蜜蜂兵團」，往往佔唔到甜頭，當中近兩次德盃交鋒，法定時間90分鐘都不分勝負。拜仁慕尼黑讓波有暗湧，寧博多蒙特讓球客勝。（無綫翡翠台、TVB 13周日凌晨2時直播）
哥迪奧拿執教拜仁3季都奪得聯賽冠軍，唯獨只曾於13/14年球季捧德盃，該屆要踢到加時，先至贏到多蒙特。雙方上屆4強交手，更加踢到互射12碼，由多蒙特勝出。事實上，德盃一戰定生死，兩強碰頭自然比較謹慎，避免犯錯先失波而冇仇報。因此，即使拜仁以攻力強橫見稱，恐怕亦唔敢冒進，想喺法定時間內擊敗多蒙特，相當困難。
上屆德盃亞軍多蒙特亦有隊長曉姆斯告別，呢位中堅將於今夏轉投拜仁慕尼黑，佢近日畀人發現買咗大批紙箱準備搬屋，已被球迷當成「叛徒」，球會甚至唔為佢舉行告別儀式。不過祖家喺慕尼黑嘅曉姆斯聲言轉投拜仁原因相當複雜，亦多得部分多蒙特球迷諒解，即使即將離別，佢對「蜜蜂兵團」嘅愛始終如一，並矢志要喺今仗擊敗拜仁，將德國盃獻畀多年嚟愛戴佢嘅多蒙特球迷，為自己「救贖」。
德盃近5對拜仁 法定時間僅1敗
多蒙特近年喺聯賽一直被拜仁食住，轉戰盃賽當然唔想再衰喺死敵腳下，爭盃鬥心甚至比對手更強。多蒙特對上一次捧德國盃係11/12年球季，當時決賽大勝拜仁5比2。球隊近5次喺德國盃遇上拜仁，法定時間內取得1勝3和僅1敗佳績，今晚「蜜蜂兵團」強陣出擊，90分鐘內有力保持不敗。
页:
[1]