史篤城熱刺大騷Encore
今晚英超獨腳戲，「二哥」熱刺作客硬撼史篤城。熱刺爭標仍未絕望，餘下賽程場場當決賽踢，上仗更大炒曼聯3比0弗到爆燈，相反史篤城唔單止傷兵滿營，近期後防踢到失晒魂，近4仗聯賽全數開大，加上兩軍對碰經常大手交易，入球大咪錯過。（now 621周二凌晨3時直播）
哈利卡尼挑戰入球紀錄
熱刺今季一改以往嘅「海鮮味」，罕有地交出穩定高水準，主帥普捷天奴重用一班「生牯仔」，每仗都滿場飛玩壓迫，令等閒對手難以招架，以上仗對曼聯為例，本來一直0比0咬得好緊，點知下半場中段迪利阿里打破僵局後，幾分鐘嘭嘭聲開多兩槍大勝3粒，正正係佢哋不惜氣力做壓迫所得嘅成果。雖然熱刺射手哈利卡尼上仗食白果，但查實佢近3仗聯賽轟入3球，今季已累積22個士哥，同占美華迪並列，排緊射手榜冧巴溫之餘，佢亦打破咗自己同加里夫巴利、舒寧咸等名將所保持聯賽單季為熱刺嘅入球紀錄，腳風奇順。加上其他小將如迪利阿里、艾歷迪亞、基斯甸艾歷臣大熟大勇，連「水貨」拉美拿都鹹魚翻生，熱刺嘅鋒力的確得人驚。
另一邊廂，史篤城就勁多傷兵，唔計長抖嘅門將畢蘭特，仍有約拿芬禾達斯、格連莊臣、馬克威爾遜、蒙尼沙養緊傷，後3個更係中後場球員，隊長中堅梳爾哥斯復出後明顯未上力，搞到近期後防立立亂。史篤城上仗對利物浦大崩潰失咗4球，近4仗狂失9球場場開大，加上左閘派達斯黃牌啱啱夠數，今仗要坐波監更加牙煙，熱刺必定趁機撳住搶，篤散呢條豆腐渣防線，睇埋雙方近6次交手5次開大，大盤有買趁早。
页:
[1]