劉業強夫婦英國狂贏
煞科剛剛一星期,香港冇馬跑,外國繼續馬不停蹄,可能普羅大眾癮起,前晚馬會越洋轉播英國賽事並受注,新市場七場加埋都過億,約克馬場兩場都過千萬,隔山買牛嚟講,投X額話多唔多,話少點計都唔少。不過最開心,就一定係新界地王劉皇發的公子阿Ken劉業強同新抱Judy葉愛愛,佢兩公婆隻「驌龍」剛季喺香港一W都冇,但佢哋前晚喺英國卻贏番夠本。當晚新市場尾場2400米,Judy隻「光榮衛士」以大熱姿態狂勝對手七個馬位,之前兩日又有Cotai Glory開齋,跟手再有Glorious Empire報捷。其實除咗呢三隻,Judy喺英國仲有Daring Dragon及Glorious Star,雖然唔係掛阿Ken個名,但講參與,佢就一定多過老婆。聽鄉紳老友報料,呢五匹質新馬都係阿Ken買入,實行漁翁撒網,希望有一兩隻出類拔萃,可以當PP運港,暫時為止叫做全部贏過,但就未有一匹特別出色,最有希望就一定係三歲仔Glorious Empire,第四次上陣已取得第三W,遲吓如果贏到級際賽,就好大機會運港服役喎!
莊美倫
页:
[1]