飲食世界檔佳穩膽
終於來到煞科戰，正如昨日專欄所言，熱門實力馬控制大局，若果想標尾會，不要夾硬去拗頸，尤其方馬戰意如虹，確有跑高多少之感。第八場因有「戰利品」在陣，其他馬的賠率預計不會太乏味，所以我決定揀這場的方馬「飲食世界」。當然，「戰利品」是匹好馬，下一季定可在級際賽見面，但我覺得其他馬於今仗是有機可乘的，一來「戰利品」首戰二班賽，二來在B+2欄抽排極不利的13檔，若果韋達自信心爆棚蝕住來跑，極有可能會輸。
其實，我本喜歡「飲食世界」和「好易搵」，衡量過後，最終首選是「飲食世界」。主因是今仗為牠休後復出第三場，體力較「好易搵」充足，其次是抽二檔，要知B+2欄除非有變數，否則是特利內檔馬的。基於檔位差異，估計牠所處位置較「好易搵」佳。再者，方為爭冠軍，戰意亦較鮮明。
上場「飲食世界」跑1000米跟不上步速，末段撲上勢頭仍相當勁，大可當作試大閘，今番上1400米更合腳法，有埋潘頓幫手，必跑高好多，我建議第一注以此駒作膽拖「戰利品」及「好易搵」，第二注買三駒鐵角。
页:
[1]