幸運歡笑追得過
上期谷草煞科，過萬孖寶都開得出，臨尾仲整條二千幾蚊Q，真係乜仇都報晒！通常某次賽事啲戰果開到咁偏，下次應該會正路好多，大家醒醒定定嘛，無謂殺雞取卵，久唔久吊吓條命，大家玩長啲，呢個道理，咁多年都好似冇點變過。第二場五班1400米。「津津樂道」由大摩度出去，仲估佢冇一排都幾難會有表現，尤其係呢匹馬喺摩廐嗰時，都係跑極唔上名，又估唔到賀賢搞得掂，轉去佢度跑第一場，已經可以有Q，算係異數，佢肯定有好大功勞，但又可能係行運醫生醫病尾，隻馬之前減咗咁多分，唔係差到做狗餅嗰種，總會有反彈一日。呢次再出，如果有點進步，係時候出頭。
田草勝谷中
第九場三班1200米。「幸運歡笑」上次我有品題，但唔係想認叻，只係想道出，呢匹馬田草肯定比谷戰好呢個道理，相信大告依家已經好清楚呢回事。冇錯，此駒上次跑個第二，唔算好勁，輸畀隻「驍武」，唔覺賽事水準高，但講真吖，今場啲對手又有幾勁？以佢自己嘅實力，要爭冠軍，並唔係冇本錢，可以再追多場。
第十一場二班1200米。「英勇大師」與韋達份外夾，合作3次冇W有P，呢啲咪叫做好配搭，想當日，蔡明紹騎成點，都唔想再講嘞，機會，有時真係只留畀有準備嘅人！
講到隻馬，二班夠唔夠？我唔知，抱着寧買當頭起呢個宗旨，唔會錯得去邊啩，只係嫌太熱啫。(陳華棟 資深評馬人)
页:
[1]