金珀龍華質高連捷
今季谷草提早煞科，呢晚係最後一夜，會唔會因為「拉士」，賽果比較正路，出現皆大歡喜結局，我真係唔知，亦唔敢預測，純粹係一廂情願，希望馬仔生生性性，等多馬友中到。第二場四班1200米。「金珀龍華」上次擺個韋達上去，排4檔都有3倍半，贏完加磅，轉抽12檔，用埋莫雷拉，擒晚獨贏長時間在3倍以下，呢條根本唔係數！如果唔係上次有份中，呢次肯定唔再吼，當然，上次我已經講過呢匹馬高質，希望可以再贏。
第三場四班1650米。「自成一格」上次輸得不明不白，真係唔知衰邊瓣，好彩賽後驗唔到啲乜，即係健康冇問題。呢次再加強搭配，搵到潘頓，睇得出阿航都想拼個明白，可唔可以翻身？唔敢寫包單，但隻馬質超四班係必然，唔太熱可以博吓。
第八場三班1650米。有「黃金宅男」在陣，又有「一哥」、「幸運金龍」等駒，賠率一定側埋一邊，「紅簿仔」仲要由潘頓換上薛寶力，進一步降溫，所以，昨晚獨贏十幾倍，咪以為唔正常。計馬又唔會比任何對手失色，係衰在d檔啫，若然人馬發揮到水準，直路鬥後勁，一定唔輸蝕。陳華棟 資深評馬人
页:
[1]